وحي من صورة

خطر(ن) يصب الزين من خدها طيب
وعينن من الانعاس صارت صريعه

وشفايفن حمرن رقاق ومراطيب
لا هي على ضيقن ولا هي وسيعه

والوجه صبحن طار صوبه يعاسيب
والورد في وجهه تفتق ربيعه

رموشها دقاق(ن) طوالن مهاذيب
وفي العين سر(ن) ليتها لي تذيعه

وخشمن على الخدين عالي المراقيب
يا هي لمجنون الضماير فجيعه

كن الذهب في شعرها له ملاهيب
تشري فوادي نوب ونوبن تبيعه

يا كثر ناسن يطلبونه مطاليب
وما اكثر قلوبن من سببها وجيعه

من وين ما شفته فلا به عذاريب
يطيعها زينن وهي ما تطيعه

ياسلسبيلن منيتي م المشاريب
او حلو عناب القلوب المجيعه

مالوم لو والف معا مثلها الذيب
يهوى مواصلها وكب القطيعه

حلاق الغلا في كفها له مقضايب
يولع بها زينن وهي له وليعه

ينوخ جمال الكون عنده مراكيب
تصهر جمال الكون فيها وتميعه

ملت علي الشرق هو والمغاريب
وضاق الشمال ابها وجنوب البقيعه

اربع جهاتي كلها له معازيب
سهل ووعر والمرتفع والوضيعه

اشب من شانه مع اليوم وآشيب
وصدري لها شق(ن) ولا له رقيعه

تمشي تكب الزين قدمه تكابيب
لا هي على ريث(ن) ولا هي سريعه

تشبه لغيمن غيّب الشمس تغييب
يضفي لها ظلن غريب الطبيعه

يا مستحيلن بين بعدن وتقريب
اشقيتني بين العطا والمنيعه

يحضر معك عقلي على الحب وايغيب
ولا سد رَمقَ الجوع منكم ضريعه